Mont, mont!

Það er nauðsynlegt að setja hér inn litla "mont-færslu" í tilefni af gærdeginum, en þá festum við hjónin kaup á okkar fyrstu íbúð, afar fallegri íbúð í Grafarholtshverfinu nýja, nánar tiltekið í fjölbýlishúsinu nr. 16 við Þórðarsveig. Því miður vorum við ekki svo forsjál að vista myndirnar af íbúðinni þegar þær enn voru á vefnum og því verða áhugasamir að bíða með að sjá herlegheitin fram í september, þegar við flytjum inn.

Margir hafa lýst furðu sinni á því, að Seltirningurinn ég skuli vilja flytja svona í hinn enda borgarinnar. Og ekki hefði ég trúað þeim manni sjálfur, sem hefði sagt mér fyrir nokkrum árum, að þar myndi ég enda - í námunda við Reynisvatnið, sem maður fór í skólaferðalög til í æsku og fannst maður kominn svo gríðarlangt út fyrir borgarmörkin. En allt er breytingum háð, og nú hlakka ég til að flytja í Grafarholtið góða. Kostir þess eru margir, og má t.d. nefna þrjá: a) Íbúðirnar þar eru nýlegar, og því lítil hætta á nauðsyn viðgerða í bráð, en það hentar "handlögnum" mönnum eins og mér vel; b) Nálægðin við náttúruna; c) Það er styttra vestur í bæ en menn halda, sérstaklega á góðri Corsu

Athugasemdir

[Þráinn (IP-tala skráð) 5.5.2007 kl. 16:42]

Til hamingju, ég skoðaði myndir meðan þær voru á netinu, rosa flott.

[Sunna Dóra Möller, 5.5.2007 kl. 16:44]

Til hamingju Þorgeir og Hlín! Það er fínt að búa hér í sveitinni (efri byggðir Reykjavíkur) og í námunda við tvö stór stöðuvötn, annars vegar Reynisvatnið og hins vegar Rauðavatnið! Grafarholtið er án efa afar gott hverfi líkt og vonandi á ykkur hjónum eftir líða vel í nýju íbúðinni! Með kveðju, Sunna Dóra

[Ninna Sif (IP-tala skráð) 5.5.2007 kl. 20:39]

Kæru hjón, til hamingju með þennan stóra áfanga.  Megi hamingjan umvefja ykkur í nýju íbúðinni.  Ég er líka ein af þeim sem hélt að það væri beinlínis ekki hægt að draga andann austan Hringbrautar, en viti menn, hamingjuna er víðar að finna!

[Guðni Már (IP-tala skráð) 5.5.2007 kl. 21:39]

Til hamingju, margt gott fólk að flytja í Grafarholtið, Þorkell Gunnar og fjölskylda hans flytur í júní og þið í haust. Þetta veit á gott!

 Innilega til hamingju

[Ólafur Jóhann Borgþórsson, 6.5.2007 kl. 01:36]

Innilega til hamingju - ég vissi að þú værir dreifbýlismaður í hjarta þínu!

[Jóhann Þorsteinsson, 6.5.2007 kl. 23:51]

Ef þeir sem búa í Grafarholtinu teljast til dreifbýlismanna þá bý ég líklega í annarri heimsálfu. Annars óska ég ykkur til hamingju með íbúðina og vona að ykkur muni líða vel þar.

[Þorgeir Arason, 7.5.2007 kl. 21:37]

Bestu þakkir fyrir góðar kveðjur! Dreifbýlið er mjög teygjanlegt hugtak, en Akureyri er vissulega í annarri heimsálfu