Sunnudagsbíltúr í fermingarveislu

Tinna Björk Magnúsdóttir, þremenningur við mig, var fermd í morgun af síra Gunnari Björnssyni í Selfosskirkju. Fórum við Hlín ásamt frændgarði mínum í sunnudagsbíltúr austur fyrir fjall eftir hádegið í fermingarveislu hennar, en ekki vorum við nægilega skyld fermingarbarninu til að vilja fara í fermingarmessuna sjálfa, og auk þess stýrði ég vel sóttri lokasamveru sunnudagaskóla Grafarholtssóknar kl. 11 í morgun. Góðan róm heyrði ég hins vegar gerðan að athöfn síra Gunnars.

Veislan var haldin í samkomusalnum Stað á Eyrarbakka, og var vel veitt af keti og kökum eins og minna ágætu, sunnlenska ættmenna var von og vísa. Veður var bjart og gaman að keyra Þrengslin, og ekki síður að koma á Eyrarbakka sjálfan. Það er snyrtilegur bær og nokkuð sjarmerandi, enda töluvert af gömlum húsum þar. Nálægðin við Litla-Hraun myndi alls ekki fæla mig frá að búa þar, ef svo bæri undir. Aksturinn frá höfuðborginni er styttri en margan grunar, vart nema hálftími frá borgarmörkunum. Kirkjan er forn og falleg. Óhætt að mæla með sunnudagsbíltúr á Eyrarbakka.

 

Athugasemdir

[Guðmundur Br. (IP-tala skráð) 16.4.2007 kl. 12:53]

Blessaður Þorgeir!

Það er mikið af fallegum kirkjum allt í kringum Reykjavík - og vitaskuld víðar. Ég vil benda þér á eina; það er Kálfatjarnarkirkja á Vatnsleysuströnd. Það er falleg kirkja og þar liggja forfeður mínir og frændur og frænkur allt um kring. Og reyndar ein lítil systir fædd 1955 og dó sama ár - af því öllu er til merkileg saga sem segir manni og kennir að við erum ekki mest og ráðafrekust í veröldinni.  Að Kálfatjörn sátu merkir prestar fyrrum - sumir sálmaskáld og hagyrðingar hinir mestu. Sá prestur sem markaði mitt lífshlaup og þjónaði Kálfatjörn þegar ég tók við sakramentinu fyrst var séra Bragi Friðriksson, hann sat ekki Kálfatjörn enda var slíkt þá aflagt - en hann bæði kenndi mér (nú fá sjálfsagt Siðmenntarmenn svima - en þeim er  léttir vísast þegar ég segi að sr. Bragi kenndi mér ekki bara Kristinfræði heldur og líka Ensku) . Sr. Bragi er einstakt góðmenni, ákveðin og fastur fyrir - en ótrúlega ljúfur og góður maður og ég man að okkur þótti hann frábær. Ekki spillti fyrir að hann brá stundum á leik og kom með okkur í fótbolta, eða tók þrumu vítaköst á okkur í handbolta.

Kveðja, Guðmundur

[Þorgeir Arason, 16.4.2007 kl. 16:20]

Blessaður og sæll Guðmundur og þakka þér fyrir þessa áminningu um Kálfatjarnarkirkju og persónulega frásögn af henni. Kirkjuferð á Vatnsleysuströndina er sannarlega efni í annan sunnudagsbíltúr, sem stefnan er hér með sett á!

Kær kveðja, Þorgeir.

[Sólveig, 17.4.2007 kl. 13:35]

Ég get svo svarið það.. "síra," "frændgarður," "ket".  Ef ég þekkti þig ekki betur myndi ég stórlega efast um uppgefinn aldur... og halda að 93 að verða 94 væri nærri lagi 

[Jón Ómar Gunnarsson, 17.4.2007 kl. 19:27]

"Ef ég þekkti þig ekki betur myndi ég stórlega efast um uppgefinn aldur... og halda að 93 að verða 94 væri nærri lagi"

Ég biðst afsökunar á þessu Þorgeir, en við getum ekki haldið þessu leyndu frá umheiminum lengur. 

Sólveig hinn ungi Þorgeir er einungis eldri maður í "skynlíkama", hinn raunverulegi Þorgeir Arason er 97 ára gamall húnvetningur sem jafnframt er formaður Framsóknarfélagsins í  Vestur Húnavatnssýslu. Á árunum 1956 - 72 var hann einn af forkálfum Samvinnuhreyfingarinnar og tók meðal annars þátt í stofnum Kron. Hann bauð sig þrisvar fram til Alþingis en náði aldrei kjöri, en sat í sveitastjórn lengi vel. Þorgeir hinn eldri á þó langan feril að baki innan þjóðdansafélagsins þar sem hann hefur verið potturinn og pannan í öllu starfi frá árinu 1953. Þorgeir var um tíma í ritnefnd Tímans, og lék hann á þeim árum eitt af aðalhlutverkunum í kvikmyndinni 79 af stöðinni.

[Sólveig, 22.4.2007 kl. 23:57]

Já, ótrúlegt 97 ára og lítur bara svona vel út miðað aldur!