Orð kvöldsins

Fyrir nokkrum vikum veitti ég því eftirtekt að Orð kvöldsins, kristileg kvöldhugleiðing Ríkisútvarpsins, var ekki lengur á sínum stað rétt fyrir tíufréttirnar. Í fyrstu hélt ég að hér væri um tímabundin mistök að ræða, en nú er komið í ljós að ákvörðun hefur verið tekin um að fella þennan dagskrárlið niður í dagskrá Rásar 1.

Þar sem ég var nokkuð viss um, að fleiri en ég myndu sakna þessa stutta en uppbyggilega dagskrárliðar, hringdi ég á Ríkisútvarpið í gær til að spyrjast fyrir um málið. Þar varð fátt um svör, reyndar var eina skýringin sem mér var gefin sú, að þessi ákvörðun hefði verið tekin af yfirmönnum Útvarpsins í samráði við Biskupsstofu. Undrandi var ég á því samráði - skyldi það hafa verið eitthvað sambærilegt og samráðið, sem Síminn hafði við Biskupsstofu um Júdasarauglýsingarnar frægu?

Hvers vegna skyldi þessi ákvörðun hafa verið tekin? Var lengd Orðs kvöldsins þvílík, að farið var að þrengja að öðru útvarpsefni? Því á ég bágt með að trúa, þar sem þessi dagskrárliður tók varla nema um 2-3 mínútur í flutningi í hvert sinn. Var það þá launakostnaður flytjenda, sem orðinn var íþyngjandi fyrir Ríkisútvarpið? Varla trúi ég að hann nemi nema brotabroti af nýlegri hækkun á mánaðarlaunum útvarpsstjóra, svo að það er afar ósennilegt.

Er þá hugmyndin sú, að hér sé mismunun á ferðinni, þar sem ekki eru allir landsmenn, og þar með allir greiðendur skattfjár og afnotagjalda, kristinnar trúar? Stendur þá til að ýta einnig öðrum dagskrárliðum með kristinni íhugun og boðun út af dagskránni, svo sem morgunbæninni og sunnudagsmessunni? Vera kann, að hér hafi verið látið undan þrýstingi þeirra afla, sem vilja veg kristni og kirkju sem minnstan í þessu landi. En gleymum því ekki, að um 95% landsmanna eru skráð í kristin trúfélög, og afar stór hluti landsmanna sækir styrk í kristna trú, m.a. með bæn og/eða lestri Biblíunnar, jafnvel daglega. Og ekki dytti sjálfum mér í hug að agnúast út í það, þó að guðlaus heimspekingur flytti erindi um efahyggju á Rás 1, eða að múslimi útskýrði orð Kóransins þar öðru hvoru. Jafnvel þó að hvorki efahyggja né múhameðstrú falli að persónulegri lífsskoðun minni, ætti ég tvo valkosti, báða góða: annaðhvort að hlusta á þetta efni, fræðast um viðkomandi lífsskoðanir og auka víðsýni mína, eða einfaldlega að slökkva á Rás 1 og velja mér annað efni til að hlusta á, sem betur félli að áhugasviði mínu. Af nógu er að taka í útvarpi, á Netinu o.s.frv.

Ég vonast til þess, að ákvörðunin um að minnka hlut þess kristilega efnis, sem fyrir er í Útvarpinu, verði dregin til baka, og að þróunin verði fremur í hina áttina, þ.e. að aukið verði við þetta efni, t.d. með því að sjónvarpa guðsþjónustum kirkjunnar eða hugleiðingum presta oftar en á jólum. Margir myndu taka þeirri aukningu í innlendri dagskrárgerð fegins hendi, og þeir sem ekki hefðu áhuga á að hlusta eða horfa á slíkt efni, hefðu úr nægu öðru að moða í fjölmiðlum.

Athugasemdir

[Hjalti Rúnar Ómarsson, 19.10.2007 kl. 20:32]

Til að byrja með eru ~90% landsmanna skráðir í kristin trúfélög, en það segir okkur afar lítið. Trúarlífskannanir benda til þess að 30%-50% séu kristnir.

En útvarpið á einmitt að vera fyrir alla og borgað af öllum, ekki bara þessa kristnu. Þess vegna er afar óeðlilegt að það skuli vera notað til þess að boða eina trú.

Og vonandi munu morgunbænin og sunnudagsmessan hverfa. 
Ég held að það hljóti að verða eðlileg þróun.

[Guðmundur Björn (IP-tala skráð) 21.10.2007 kl. 12:55]

Sæll Þorgeir, sá að þessi grein þín birtist í Morgunblaðinu á dögunum og var ánægður með hana. Sjálfur hlustaði ég yfirleitt alltaf á Orð kvöldsins, og ég er ekki einn um að finnast þessi stutti en greinagóði dagskrárliður geri þeim gott er á hann hlustuðu. Sem barn þótti mér ríkisútvarpið fremur bagalegt en þegar maður eldist og vitrast sér maður hversu gríðarmikilvæg Rás 1 er fyrir þá sem er sækja andlega fróun í eitthvað gott, fagurfræðilegt og heilsteypt. Sama á við um messurnar og morgunbænirnar. Þetta gefur svo mörgu fólki, svo mikið.

[Guðmundur Brynjólfsson (IP-tala skráð) 22.10.2007 kl. 23:04]

Sæll Þorgeir

Þetta kemur ekki á óvart. Niðurrifsöflin eru að sækja á - rökleysa þeirra á upp á pallborðið hjá þeim sem telja sig knúna til að hlaupa á eftir þeim tíðaranda sem þessi sömu niðurrifsöfl byggja upp með niðurrifi sínu. Enn á ný er veist að þeim sem vilja - og þurfa væntanlega - að sækja sér andlegan styrk og næringu. Því má RUV auðvitað ekki sinna - það gæti stefnt öllu norður og niður - hitt er nauðsynlegra að elta tónleika um allar koppagrundir og auglýsa um leið auðhringa og afætur. Það er sjálfsagt fleirum líkn í því.